(Para kay Antonio Zumel)

Paano ko bubuhayin ang alaala
Ng aking kaibigan, asawa at ama ng aking anak
Aking kasama, guro at mahigpit na kritik

Paano ko hahaplusin ang mga larawang
Iginuhit ng aming makukulay na karanasan
Sa piling ng masa

Paano ko sisimulang
Buklatin ang libu-libong pahina
Ng mga sulatin ng pag-ibig, pagkalinga
Tampuhan at debate

Kakantahin ko ba ang kundiman ng manggagawa
Sasayaw sa tugtog ng “easy to love” ni cole porter
Magsisindi ng mababangong kandila at
Makikinig sa malalambing na awitin
Mamamasyal sa Oudegracht at uupo sa tabi ng kanal

Maaari kong gawin ang lahat ng ito
Ngunit iba ang aking mararamdaman
Sapagkat ang mga ito ay pandalawahan
Sa panaginip muling isasakatuparan

Maaari kong
Alagaan at higit na mahalin si Aya
Isapuso ang mga aral natamo mula sa masa’t kasama
Ipaglaban at ipagtanggol ang adhikain ng ating kilusan
At isalaysay sa lahat ng gustong makinig
Na may isang tulad mong natatangi
Na karapat-dapat gunitain sa tuwi-tuwina.