(Para kay Antonio Zumel) 

Mahal na kasama, mahal na kabiyak
Salamat sa lahat na iyong ginanap
Buong puso, buong buhay kang nagsilbi
sa masang anakpawis sukdulang inaapi

Sa iyong mga sulating naipalaganap
Mga ideyang nagbigay rikit na liwanag
Tanglaw sa daan tungo sa nagkakaisang kapatiran
Na siyang magluluwal ng makataong lipunan

Inakyat mo ang matitirik na bundok
Nilakad ang matitinik na patag
Hinarap ang mga mabangis na kaaway
Sa alinmang arenang may tapang at tatag

Hindi mo ininda anumang balakid
Anumang pagsubok, anumang panganib
Kahit sa sandaling katawan mo’y yayat sa sakit
Interes ng mamamayan laman ng isip at dibdib

Kaya humimlay ka o aking mahal
Sa panatag na lupang iyong minumutya
Sa dilig ng wagas na pakikibaka
Ipinunlang mga binhi’y yayabong, bubunga

Sa labi ng laksa-laksang inaba’t inapi
Mamumulaklak, mamumutawi
Tagumpay! Kalayaan! Katarungan! Kapayapaan!
Iyong mga mithii’y isa nang katuparan.